ქართული საიერიშო შაშხანა G-5

ქართულ საიერიშო შაშხანაზე საუბარი რამდენიმე თვის წინ დაიწყო, ხოლო მისი პირველი ოფიციალური პრეზენტაცია 12 აპრილს განხორციელდა, როდესაც საქართველოს პრეზიდენტმა თბილისის ავიამშენებელი ქარხანა მოინახულა, სადაც შაშხანა G-5 სხვა ქართული წარმოების შეიარაღების გვერდით იყო გამოფენილი.

შაშხანა G-5 წარმოადგენს მსოფლიოს ერთერთი საუკეთესო საერიო შაშხანის, ამერიკული M-16-ს კლონს. რომელშიც საიმედოობის გაზრდის მიზნით გატარებულია მთელი რიგი ღონისძიებები. ამ ღონისძიებებიდან პირველ რიგში აღსანიშნავია M16-ის აირის პირდაპირი მიწოდების სისტემის დაბინძურებისადმი უფრო ნაკლებად მგრძნობიარე და საიმედო აირის დგუშით შეცლა, რომელსაც მოკლე სამუშაო სვლა გააჩნია (გერმანული HK-416 ანალოგიურად). 

G-5-ს მოკლესვლიანი აირდგუში

ამას გარდა ავტომატის კონსტრუქციაში რესურსის და საიმედოობის გაზრდის მიზნით გამოყენებულია ტიტანის შენადნობისგან დამზადებული დეტალები. ასევე ფართოდაა გამოყენებული დეტალების ქრომირება, რაც მათ გარემოს ქიმიური ზემოქმედებისგან იცავს. შაშხანის სალულე იმდაგვარდაა გაკეთებული რომ მასში ლულა კონსოლურადაა დაკიდებული. თვითონ შაშხანა აღჭურვილია ოთხმხრივი პიკატინის მიმმართველით (Picatinny rail - MILSTD-1913), რომლის საშუალებითაც მასზე სხვადასხვა მოწყობილობების, მათ შორის ლაზერული მარკერების, ფანრების, ოპტიკური, კოლიმატორული და ღია სამიზნე საშუალებების დაყენებაა შესაძლებელი. გარეგნულად შაშხანა ამერიკული M-16-ს ანალოგიურია და მოიცავს ყველა იმ ერგონომიულ და მოსახერხებელ თვისებებს რაც მისთვისაა დამახასიათებელი.

საიერიშო შაშხანა G-5 მუშაობა დაფუძნებულია აირების არინების ავტომატიკის პრინციპზე, აირის დგუშის მოკლე სვლით. აირის დგუში ლულის თავზეა განთავსებული. ლულის ჩაკეტვა საკეტის მოტრიალებით ხდება, რომელსაც 7 საბრძოლო საბჯენი გააჩნია. ლულის კოლოფი ალუმინის შენადნობისაგანაა დამზადებული. დამცველი-ცეცხლის რეჟიმის გადამრთველი სამ პოზიციურია და უზრუნველყოფს ერთეული და ჯერით სროლას. კონსტრუქციაში შენარჩუნებულია M-16 სერიისთვის დამახასიატებელი, კონდახის ზემოთ განლაგებული Т-მაგვარი საკეტის შესაყენებელი სახელური და საკეტის შეყოვნების მექანიზმი.

1- Т-მაგვარი საკეტის შესაყენებელი სახელური. 2- მცველი-ცეცხლის რეჟიმის გადამრთველი.

ლულის კოლოფის ზედა მხარეს და ასევე ლულის ოთხივე მხარეს განლაგებულია პიკატინის მიმმართველები, რომლებიც სხვადასხვა აღჭურვილობის დასამაგრებლად გამოიყენება. კონდახი ტელესკოპური გასაშლელია, მრავალპოზიციური,  M-4-ის კონდახის კონსტრუქციის ანალოგიური. 

პიკატინის მიმმართველები

მრავალპოზიციური კონდახი

იარაღი ორ ძირითად ნაწილად იშლება - ზედა და ქვედა რესივერად. 

ქვედა რესივერი შესდგება და მასში მოთავსებულია შემდეგი ნაწილები:

• კონდახი (მასში მოთავსებელი ბუფერით და ზამბარით)
• ფისტოლეტის სახელური.
• სასხლეტი თავისი პროტექტორით.
• სამჭიდე.
• მცველი-ცეცხლის რეჟიმის გადამრთველი.
• საკეტის შემაყოვნებელი.
• მჭიდის გამომგდები.
• დამრტყმელ სასხლეტი მექანიზმი.

ზედა რესივერი შესდგება  და მასში მოთავსებულია შემდეგი ნაწილები:

• ლულა.
• სამიზნე მოწყობილობები.
• აირკამერა.
• დგუში.
• საკეტის ჩარჩო საკეტით.
• საკეტის შესაყენებელი სახელური.

შაშხანა გამოიყენებს 5,56X45მმ ტყვიებისთვის განკუთვნილ, ნატოს სტანდარტის ნებისმიერ მჭიდს. ასევე შესაძლებელია ორმაგ ბარაბნიანი, 100 ტყვიანი ტევადობის მჭიდების გამოყენებაც.

G-5-ის ტაქტიკურ-ტექნიკური მონაცემები:

• კალიბრი - 5,56მმ.
• ვაზნა - 5,56X45მმ.
• სიგრძე გაშლილი კონდახით - 840მმ.
• სიგრძე დაკეცილი კონდახით - 756მმ.
• ლულის სიგრძე კომპენსატორის გარეშე - 370მმ.
• სროლის ეფექტური მანძილი - 500-600მ.
• სწრაფსროლა - 700-950 გასროლა/წთ.
• მჭიდის ტევადობა - 20/30/100

სტატია ღია წყაროებზე დაყრდნობითაა დაწერილი, ამიტომ შესაძლებელია რაიმე შეცდომა იყოს დაშვებული.